NM Brass 2016

For n´te gong er Eikanger-Bjørsvik med i jakten på det edlaste av brasstrofe i Noreg. Etter at siddisane har fått låne toppetasjen på pallen eit år, er det på tide å hente den tilbake igjen.

Tilbake foran EBML er professor Nick Childs, til vanleg fast dirigent for britiske Black Dyke. Han er særs glad for å vere tilbake for fyrste gong på fem år og fylle på NM-tittelsamlinga si. Han er ein grundig og motiverande brassbandhandverker som veit å spikre til framføringar på dei rette plassane.

I år er det Stig Nordhagens "Searching for Light" som er pliktnummer i elitedivisjonen på fredagen i Grieghallen. Nordhagens musikk er eit frisk pust i brassbandrepertoaret og har fleire stykker som EBML har gjort tidlegare. For omlag eit år sidan urframførte me m.a. tingingsverket "Ground" og i EM i Oslo var "Myth Forest" også pliktnummer. Som sjuande korps ut i eliten på fredag, spelar me kl 19. 

Som sjølvvalgt har me henta fram "Trance" av ikkje ukjente Thomas Doss frå Austerrike. Interessant nok var dette opphavelege eit tingingsverk til EBML som vart gitt vidare til det sveitsiske nasjonale meisterskapet i 2014 for urframføring. Heldigvis fekk me høve til å hente fram stykket igjen til fjorårets EM, og gjekk der til topps med EBML i sjølvvalgtavdelinga. Me gler oss til å få spele dette i Grieghallen laurdag kl 16.45!

Følg oss i helga på TV2-Sumo, Facebooksida vår, @eikangerbjorsvik på Instagram, @ebml på Twitter og @ebmlsnap på snapchat. Stikk innom standen vår i Foajeen for å helse på EBML-musikantar og ønske oss lykke til!

PS: klarer du ikkje vente så lenge, kan du ta turen innom Grieghallen fyrstkomande mandag kl. 19.30. EBML testar NM-formen saman med Krohnengen Brass Band. 

---