Nye æresmedlemer i Eikanger-Bjørsvik Musikklag

I år er det 30 år sidan ein stor milepæl i Eikanger-Bjørsvik si historie. I 1986 kom Howard Snell til korpset første gong. Hans påverknad og Eikanger-Bjørsvik si utvikling sidan då er utan samanlikning, og ei fantastisk historie. Dette er kjend i Norge og i heile brass-europa. Vi avsluttar i dag sesong 30 etter Snell.

I alle desse åra har EBML vore leiande: på konsertar, innspelingar, radio- og TV-produksjonar, konkurransar, ungdomsarbeid, å knyta store dirigentnamn til brassbandet og mykje meir. Korleis har dette vore mogeleg?

To viktige omgrep for desse 30 åra er: kontinuitet og utvikling. Aller best er det når musikantar står for kontinuitet og jobber knallhardt for utvikling samstundes. Det er ein bortimot uslåeleg kombinasjon. Det finnes nokre som har gjort dette i praktisk tala heile perioden frå 1986, og gjer det framleis.

Same hausten som Howard kom til Eikanger-Bjørsvik, byrja Grethe Tonheim, Sølvi Ones og Frode Rydland i korpset. Dei har alle tre hatt uvurderleg innverknad på korpset sin suksess, på så mange felt. Grethe og Frode har vore musikalske hjørnesteinar alle åra dei spelte, og er framleis vidunderlege støttespelarar. Sølvi er i tillegg til ein bunnsolid musikant i korpset, ei uvurderleg kraft i drift, planlegging, finansiering og omdømemessig for korpset.

Alle tre har alltid vore prega av langsiktig tenking og like langsiktig arbeid. Eikanger-Bjørsvik er avhengig av musikantar med slike haldningar og kvaliteter, både i fortid, notid og framtid. Desse tre er levande døme på dette, og saman definerer dei på mange vis alle dei verdiar og haldningar eit leiande korps treng.

Det er ei stor ære å kunne utnevne Sølvi, Grethe og Frode til æresmedlemmer i Eikanger-Bjørsvik Musikklag - tre skinande eksempler til etterfølge for alle!

---

---