Travel konserthelg for tore Bryne Berg!

Sundag 8. mars spelar Eikanger-Bjørsvik konsert i Grieghallens foajé. Med seg på konserten har dei sjølvaste Sjøforsvarets Musikkorps, Bergens profesjonelle militærkorps. Tore Bryne Berg er utdanna trombonist frå Griegakademiet i Bergen og Norges Musikkhøgskule, og vart tilsett som basstrombonist i Sjøforsvarets Musikkorps i 1997. I 2001 fann han ut at det var litt lite å berre spele på dagtid – så då takka han ja til plassen som basstrombonist i Eikanger-Bjørsvik også.

Dermed fekk han 120 oppmøtedagar på fritida si, i tillegg til full jobb i forsvaret.

Dette går som regel heilt fint – bortsett frå at han no skal spele to avdelingar musikk - med to ulike korps - i to ulike uniformar på ein og same konsert.

Konserten sundag 8 mars er nesten ein milepæl for dei to korpsa: ikkje sidan tidleg 80-tal har dei møtt kvarandre i konsertsamanheng. Begge partar gler seg til dette musikalske møtet.

Eikanger-Bjørsvik har henta inn gjestedirigent frå Sveits, og vil dermed framføre eit program beståande av sveitsiske komposisjoner. Dirigenten heiter Michael Bach, og komponistnamna er Waespi og Doss.

Sjøforsvarets Musikkorps har henta heim Melands store son, Bjørn Sagstad – og dei skal framføre eit program med komponistnamn som Holst, Sunde, Adams og Turner. 

Konserten er altså sundag 8. mars i Grieghallens foajé kl. 19.00

---